Bifhjólasamtök lýðveldisinns Sniglar

Jæja gott fólk, þá er komið að loka átakinu í undirskriftarsöfnuninni gegn nýjum umferðarlögum. Lokadagur í söfnun undirskrifta verður 12. desember næstkomandi og verður Ögmundi Jónassyni, innanríkisráðherra afhentur listinn í þeirri viku, þegar hann leggur frumvarpið fyrir alþingi. Undirskriftirnar eru komnar töluvert á þriðja þúsundið og gaman væri ef að þær næðu að verða fleiri en 3000 talsins. Er stefnan sett á að fjölmenna á þingpallana við fyrstu umræðu líkt og síðast og verður því opinn viðburður opnaður bráðlega á Facebook svo það er um að gera að fylgjast vel með. Allt stefnir í að frumvarpið þurfi að komast í gegnum þingið í vetur þar sem að mörg atriði í þeim lúta að sameiginlegum lögum ESB sem þurfa að taka gildi ekki seinna en 2013. Meðal þeirra atriða er hækkun bifhjólaprófsaldurs um 3 ár, í 20 ár í stað 17, lögfesting laga um hlífðarfatnað auk fleiri atriða sem hægt er að skoða í fréttum á sniglar.is en hér er textinn sem fólk hefur skrifað undir:

"Ég vil mótmæla að hækka eigi lágmarksaldur töluvert til bifhjólaréttinda umfram lágmarksaldur til bílprófs. Ég mótmæli því einnig að ég megi ekki reiða barn sem nær niður á fótstig og er í góðum hlífðarfatnaði.

Ég mótmæli ennfremur því að hver sem er megi keyra skellinöðru án nokkurrar þjálfunar og reiða farþega. Síðast en ekki síst mótmæli ég því að vera skyldug/ur til að nota hlífðarfatnað sem enginn getur skilgreint."

Á vormánuðum, nánar tiltekið helgina 1.-2. apríl, héldu Sniglar málþing um öryggi og ímynd bifhjólafólks á Íslandi. Málþingið var tvískipt, á föstudeginum 1. apríl var það með þjóðfundarsniði þar sem fulltrúar hinna ýmsu mótorhjólaklúbba og fleiri komu saman og skiptust á skoðunum um það hvar áherslur ættu að liggja í baráttunni fyrir bættu öryggi og ímynd bifhjólafólks. Fundurinn stóð yfir í tvo tíma og var margt gott og áhugavert sem kom út úr honum.

Á laugardeginum var málþingið með hefðbundnu ráðstefnusniði. Haldnir voru nokkrir fyrirlestrar fyrir hádegi og var efni þeirra mjög fjölbreytt. Umferðarnefnd Snigla sagði frá helstu verkefnum sem unnið var að og bar þar hæst verkefni í samstarfi við Vegagerðina um lagfæringar á vegakerfinu með það að markmiði að auka öryggi bifhjólafólks. Einnig var sagt frá svokallaðri Núllsýn sem er verkefni sem miðar að því að fækka banaslysum í umferðinni.

Þrír góðir gestir fluttu einnig fyrirlestur á málþinginu. Ágúst Mogensen hjá Rannsóknarnefnd umferðarslysa sagði frá bifhjólaslysum og hvað væri hægt að bæta til að koma í veg fyrir þau. Holger Torp frá Umferðarstofu sagði aðeins frá bifhjólaréttindum og hvaða breytingum þau taka ef ný umferðarlög verða samþykkt óbreytt á Alþingi og Sigrún Knútsdóttir kynnti síðan starfsemi Grensásdeildar LSH. Áður en haldið var í hádegismat var síðan sagt lauslega frá niðurstöðum þjóðfundarins frá deginum áður.

Eftir að málþingsgestir höfðu fyllt maga sína var haldið áfram. Ögmundur Jónasson, Innanríkisráðherra, hélt ræðu og að henni lokinni sátu Ögmundur, Geir Jón Þórisson frá Lögreglunni, Hreinn Haraldsson vegamálastjóri, Runólfur Ólafsson FÍB, Sigurður Helgason frá Umferðarstofu og Hrönn Bjargar Harðardóttir úr stjórn Snigla, fyrir svörum fundargesta. Umræðurnar voru hinar líflegustu og margt áhugavert sem kom þar fram eins og sjá má í myndbandinu hér fyrir neðan.

Af óviðráðanlegum ástæðum hafa niðurstöður þjóðfundarins ekki enn verið gerðar opinberar en bætt verður úr því á næstunni. Fyrirlestrarnir og umræðurnar á laugardeginum voru hins vegar teknar upp og eru aðgengilegar á youtube síðu Snigla og einnig er hægt að horfa á þér neðar í þessari frétt.

Setning

Núllsýn

Verkefnin

Vegagerðarverkefnið

Einhverjar hættulegustu akstursvarnir gagnvart mótorhjólafólki eru víravegrið. Þau samanstanda af einum eða fleiri stálvírum sem er haldið uppi af staurum. Að lenda á svoleiðis vír eða staurunum er versta martröð hvers hjólamans en vegagerðir margra landa halda áfram að setja upp víravegrið því ódýrt er að koma þeim upp. Sjálfstæð rannsókn sýnir hins vegar fram á það að viðhaldskostnaður víravegriða er mjög hár og étur upp sparnaðinn sem næst við að setja þau upp.

Sænski byggingarverkfræðingurinn Hawzheen Karim rannsakaði viðhaldskostnað akstursvarna í doktorsritgerð sinni árið 2008. Ein helsta niðurstaða hans er að vegagerðir einblína á kostnaðinn við uppsetningu en vanrækja að horfa á kostnað við viðhald og hvers ástæður þess að viðhaldsins er þörf. Ritgerðin, sem heitir "Bætt vegahönnun með komandi viðhald í huga - Greining á viðhaldskostnaði vegriða" (e. Improved Road Design for Future Maintenance - Analysis of Road Barrier Repair Costs), ber saman ríkjandi vegriðakerfi í Skandinavíu: víravegriðin, hefðbundin w-bita vegrið, svokölluð kohlswa-bita vegrið og pípuvegrið (sjá myndir að neðan)

Gögnin og tölfræðilíkönin sem Hawzheen Karim notar sýna að víravegriðin þarfnast viðhalds eftir jafnvel minniháttar skemmdir því vegriðin eru ekki eins sterkbyggð og önnur vegrið. Miðað við útreikninga hans er viðhaldskostnaður á hvern ekinn kílómetra þrisvar sinnum hærri á víravegriðum heldur en á hefðbundnum w-bita vegriðum, jafnvel þó að meðal kostnaður fyrir hverja viðgerð sé nánast sá sami. W-bita vegriðin þurfa einfaldlega mun sjaldnar á viðgerð að halda eftir minniháttar ákeyrslur.

Hawzheen Karim fann það út í rannsóknum sínum að megnið af viðhaldskostnaði vegriða kemur til vegna viðgerða á skemmdum eftir að farartæki lendir á vegriðinu. Hann komst að því að viðhaldskostnaður vegna slysa er hærri á vegum með 70 km/klst og 90 km/klst hámarkshraða heldur en á vegum með 110 km/klst hámarkshraða. Ein af skýringunum á þessu, samkvæmt Karim, er að vegir með 110 km/klst hámarkshraða hafa betri hönnunarstaðla og betri öryggiseiginleika. Í Svíþjóð eru hraðari vegirnir með betra yfirborði, fjarlægðin að akstursvörnunum er meiri og akreinarnar eru breiðari.

Rannsóknir Hawzheen Karim segja okkur því tvennt. Fyrir það fyrsta er engin réttlæting fyrir notkun á víravegriðum. Fyrir suma vegfarendur eru þau mjög hættuleg og svo eru þau dýrari heldur en önnur vegriðakerfi ef horft er á heildarmyndina. Í öðru lagi þá staðfestir Karim það að hönnun vega er lykilatriði í því að koma í veg fyrir slys. Á þetta hefur FEMA, og Sniglar, bent á í mörg ár.

Ritgerð Hawzheen Karim er að finna hér fyrir þá sem vilja kynna sér hana betur.

Fundur með tryggingafélögunun verður haldinn miðvikudaginn 13. apríl næstkomandi á Grand hótel Reykjavík og hefst hann kl 19.30 stundvíslega og stendur til 22.00.

Hafa öll tryggingarfélögin boðað komu sína á fundinn.

Umræðuefni fundarins eru tryggingar og skilmálar þeirra,
Þetta er einstakt tækifæri fyrir tryggingarfélögin og ykkur, að  eiga opin samskipti um mikilvæg atriði eins og:
Skilmála tryggingar
Bótarétt
Flokkun bifhjóla í tryggingum
Hlífðarfatnað o.fl.

fundurinn er opinn öllum og er aðgangur ókeypis,  hlökkum til að sjá ykkur

Nú styttist óðfluga í málþing Snigla um öryggi og aðstæður bifhjólafólks á Ísland. Málþingið verður haldið helgina 1. - 2. apríl og verður í Gamla kennaraháskólanum við Stakkahlíð. Föstudaginn 1. apríl, verður þjóðfundur fyrir hjólafólk þar sem mótuð verður framtíðarsýn bifhjólafólks hvað varðar öryggismál og ímynd bifhjólafólks. Þjóðfundurinn er opinn öllu hjólafólki og hvetjum við þá sem vilja taka þá að skrá sig með því að senda póst á Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það.

Á laugardeginu, 2. apríl, tökum við daginn snemma og hefjum dagskrána kl 10 um morgunin. Þar verður fjallað um það sem Sniglar hafa verið að vinna að upp á síðkastið og áherslan verður aðallega á forvarnir og framtíðina. Eftir hádegi verða svo opnar umræður þar sem meðal annars innanríkisráðherra, Ögmundur Jónasson, verður meðal þátttakenda.

Bifhjólasamtök lýðveldisins - Sniglar ætla að hefja sumarvertíðina með málþingi, þar sem við ætlum að dusta vetrardvalann af hagsmunamálum okkar og gíra upp fyrir glæsilegt hjólasumar. Málþingið verður haldið í húsnæði Menntavísindasviðs Háskóla Íslands við Stakkahlíð dagana 1. og 2. apríl næstkomandi. Megin áhersla málþingsins verður á forvarnir og núllsýn í umferðinni.

Málþinginu verður skipt í tvennt, lokaður þjóðfundur á föstudag og svo opið málþing á laugardeginum. Dagskrána má finna hér.

Á fundinn á föstudeginum milli 17:00 og 19:00 hafa verið boðaðir fulltrúar allra hjólaklúbba sem Sniglar hafa á skrá. Hlutverk fulltrúanna verður að taka þátt í að móta áherslur í framtíðarsýn bifhjólafólks og þannig ljá verðugum hagsmunum rödd sína. Eða á mannamáli, svara spurningunni um fyrir hverju ættu forsvarsmenn bifhjólafólks að vera berjast næstu misserin? Enn eru laus nokkur pláss og hægt að skrá sig í tölvupósti á Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það. .

Á laugardeginum hefst dagskráin kl: 10:00 og stendur til 16:00. Þá verður opið málþing sem hver sem er getur mætt á og tekið þátt í umræðunum.

Fyrir hádegi verður fjallað um það sem Sniglar hafa verið að vinna að upp á síðkastið og áherslan verður aðallega á forvarnir og framtíðina. Boðið verður upp á súpu í hádeginu.

Eftir hádegi mun svo Ögmundur Jónasson innanríkisráðherra flytja ávarp og taka þátt í pallborðsumræðum ásamt fulltrúum frá FÍB, lögreglunni, vegamálastjóra og umferðastofu. Að því loknu verða atriði á svæðinu kringum skólann þar sem fólki verður boðið upp á að fá smá upprifjun um rétt handbrögð undir handleiðslu kennara og bifhjólavirkja , möguleika til að prufa vespur og trial –hjólasýning, ef veður leifir. Hægt verður að skrá sig á námskeið í keyrslu á möl, upprifjunarnámskeið, aðkomu að slysi og fleira. Ýmis umboð og verslanir verða með kynningar á svæðinu á vörum sínum, allt frá hjólum og hlífðarfatnaði til stoðtækja.

Dagskrá málþingsins verður fjölbreytt og viljum við hvetja allt bifhjólafólk að taka þátt í þessari fyrstu uppákomu vorsins, og mæta á hjólunum ef veður leyfir.

Hjólin okkar flestra eru farin að ókyrrast eftir vetrardvalann.  Vorið er að koma, og glæsilegt hjólasumar á næsta leiti. Hefjum vertíðina eins og við viljum enda hana, meðvituð um hætturnar í umferðinni en með gleðina í hjartanu. Stefnum að því að í ár verði Núllsýnar hjólasumar,

Engin alvarleg slys og engin dauðsföll í umferðinni.

Undirbúningsnefnd.

Tryggingarmálin verða í brennideplinum á félagsfundi á morgun, miðvikudaginn 16. mars. Meðlimir í stjórn og umferðarnefnd Snigla verða á staðnum til að fara yfir hvað er í gangi í þessum málaflokki.

Ef þú vilt fá upplýsingar um þessi mál, koma með ábendingar eða bara ræða þessi mál kíkið þá við á félagsfund í félagsheimilinu í Skeljanesi. Verðum með heitt á könnunni.

Umferðarnefnd Snigla sat í dag fund með Ögmundi Jónassyni, innanríkisráðherra og var fundarefnið nýtt frumvarp um umferðarlög sem að ráðherra hefur lagt fram aftur á þessu þingi. Umkvörtunarefni Bifhjólasamtaka Lýðveldisins voru þau sömu og áður en í nýju lögunum er hart vegið að frelsi mótorhjólafólks. Má þar meðal annars nefna áframhaldandi skyldunotkun hlífðarfatnaðar en þar hafa Sniglar lagt til að farið verði eftir því sem önnur lönd í kringum okkur gera, sem er að skylda notkunina aðeins við þá sem hafa akstur mótorhjóla að atvinnu. Ennfremur gerðu Sniglar athugasemdir við aldurmörk bifhjólaréttinda sem hækka á um þrjú ár, en það eru ítrustu viðmið ESB og hafa margir tekið undir með okkur að það sé alltof mikið. Að lokum gerði nefndin athugasemdir við 150 sm lágmarkshæð farþega og æfingarakstur á bifhjóli, sem og að fjalla aðeins um hvað hægt sé að gera fyrir yngsta aldurhópinn léttu bifhjólunum. Skemmst er frá að segja að Ögmundur tók vel í málaleitan umferðarnefndarinnar og sagði hana vel ígrundaða. Ekkert hefur þó verið ákveðið ennþá en þar sem búið er að leggja málið fram aftur höfum við unnið aftur tíma til að koma að frekari athugasemdum. Fyrir hönd Snigla sátu fundinn Gunnar Gunnarsson formaður Snigla, Inda Björk Alexandersdóttir og Njáll Gunnlaugsson, fulltrúar Snigla í Umferðarráði.

Um mitt síðasta ár leitaði Samgöngunefnd Alþingis til umferðarnefndar Snigla og bað um að veitt yrði umsögn við frumvarp til umferðarlaga sem var þá til umfjöllunar hjá nefndinni. Umferðarnefnd fór yfir lögin og fann eitt og annað sem betur mætti fara og unnar voru tillögur því til úrbótar. Frumvarpið er nú komið á byrjunarreit aftur eftir að Innanríkisráðherra lagði það fram á þingi aftur.

Til fróðleiks fyrir hjólafólk er umsögn Snigla við umferðarlögin hér að neðan.

Til nefndarsvið Alþingis

Efni: Umsögn um Frumvarp til umferðarlaga, Þskj. 943 — 553. mál.

Síðastliðið ár hafa Bifhjólasamtök Lýðveldisins, Sniglar, veitt umsögn á vinnu nefndar Samgönguráðuneytisins sem unnið hefur að nýju frumvarpi til umferðarlaga. Sniglar hafa sent inn ýmsar athugasemdir við frumvarpsdrögin og hefur að miklu leyti verið tekið tillit til þeirra. Eftir standa þó fjórar athugasemdir sem ekki hefur verið tekið tillit til þrátt fyrir ítarlegan rökstuðning með þessum athugasemdum. Einnig hefur það komið fyrir að tekið hafi verið tillit til athugasemda Snigla og það svo dregið til baka samanber ákvæði um hlífðarföt sem farið var út úr frumvarpsdrögum númer 2 en birtist svo aftur í frumvarpinu sem lagt var fyrir Alþingi. Í tillögum okkar hér að neðan koma fyrst lagagreinarnar sem við höfum athugasemdir við óbreyttar, svo það sem við leggjum til að breytist og að lokum rökstuðningur fyrir okkar athugasemdum.

43. gr. Almennar reglur um akstur bifhjóla.
Bifhjóli má eigi aka samhliða öðru ökutæki, nema þegar ekið er samhliða öðru bifhjóli á sömu akrein í þéttbýli, enda sé hámarkshraði þar eigi meiri en 60 km á klst. og aðstæður leyfa slíkt.
Bifhjóli má eigi aka á gangstétt eða göngustíg, nema skilyrði 2. mgr. 26. gr. eigi við.
Á bifhjóli og hliðarvagni þess má eigi flytja fleiri farþega en ökutækið er ætlað til.
Óheimilt er að flytja farþega á léttu bifhjóli nema ökumaður sé 20 ára eða eldri, enda sé bifhjólið til þess ætlað.
(Barn sem er 150 sm eða lægra að líkamshæð má ekki vera farþegi á bifhjóli)
Ökumaður og farþegi bifhjóls skulu að jafnaði hafa báða fætur á fótstigum eða fóthvílum, báðar hendur á stýri og bæði (öll) hjól bifhjólsins á vegi þegar það er á ferð.

Tillaga: Fimmta málsgrein falli út

Rökstuðningur: Rök sem vísað er í eiga ekki við þegar kemur að bifhjólum enda eðli bifhjóla og bifreiða gjörólíkur þegar kemur að þessum hlutum. Ekki er um neinn öryggisbúnað að ræða á mótorhjólum sem vísað er í varðandi hæðartakmarkanir í bílum. Lykilatriði er að farþegi bifhjóls nái niður á fótstig eða fóthvílur.

56. gr. Ökuréttindaflokkar.
Réttindi og aldur til að öðlast ökuleyfi til að aka vélknúnu ökutæki skiptast í eftirfarandi flokka:
1. AM-flokkur: Réttindi til að stjórna léttu bifhjóli. Ökuskírteini fyrir AM-flokk má veita þeim sem er orðinn 16 ára.
2. A1-flokkur: Réttindi til að stjórna bifhjóli: a. á tveimur hjólum með vélarafl ekki meira en 11 kW, með slagrými ekki meira en 125 cm³ og hlutfall milli afls og eigin þyngdar ekki meira en 0,1 kW/kg, b. á þremur eða fleiri hjólum með afl ekki meira en 15 kW. Ökuskírteini fyrir A1-flokk veitir jafnframt réttindi til að stjórna léttu bifhjóli í AM-flokki og beltabifhjóli. Ökuskírteini fyrir A1-flokk má veita þeim sem er orðinn 18 ára.
3. A2-flokkur: Réttindi til að stjórna bifhjóli á tveimur hjólum með vélarafl ekki meira en 35 kW og hlutfall milli afls og eigin þunga ekki meira en 0,2 kW/kg og sem ekki er leitt af ökutæki með meira en tvöfalt afl. Ökuskírteini fyrir A2-flokk veitir jafnframt réttindi til að stjórna bifhjóli í A1-flokki, léttu bifhjóli í AM-flokki og beltabifhjóli. Ökuskírteini fyrir A2-flokk má veita þeim sem er orðinn 20 ára.
4. A-flokkur: Réttindi til að stjórna bifhjóli á tveimur hjólum, með eða án hliðarvagns, með slagrými yfir 50 cm3, sé það búið brunahreyfli og hannað til hraðari aksturs en 45 km/klst. á þremur eða fleiri hjólum með afl meira en 15 kW, jafnframt réttindi til að stjórna bifhjóli í A1- og A2-flokki, léttu bifhjóli í AM-flokki og beltabifhjóli. Ökuskírteini fyrir A-flokk má veita þeim sem er orðinn 22 árs með því skilyrði að hann hafi a.m.k. í tvö ár haft ökuskírteini fyrir A2-flokk eða hann sé orðinn 24 ára og hafi lokið námi og prófi fyrir A-flokk.

Tillaga: 1. AM-flokkur: Réttindi til að stjórna léttu bifhjóli. Ökuskírteini fyrir AM-flokk má veit þeim sem er orðinn 15 ára.
2. A1-flokkur: Réttindi til að stjórna bifhjóli: a. á tveimur hjólum með vélarafl ekki meira en 11 kW, með slagrými ekki meira en 125 cm³ og hlutfall milli afls og eigin þyngdar ekki meira en 0,1 kW/kg, b. á þremur eða fleiri hjólum með afl ekki meira en 15 kW. Ökuskírteini fyrir A1-flokk veitir jafnframt réttindi til að stjórna léttu bifhjóli í AM-flokki og beltabifhjóli. Ökuskírteini fyrir A1-flokk má veita þeim sem er orðinn 16 ára.
3. A2-flokkur: Réttindi til að stjórna bifhjóli á tveimur hjólum með vélarafl ekki meira en 35 kW og hlutfall milli afls og eigin þunga ekki meira en 0,2 kW/kg og sem ekki er leitt af ökutæki með meira en tvöfalt afl. Ökuskírteini fyrir A2-flokk veitir jafnframt réttindi til að stjórna bifhjóli í A1-flokki, léttu bifhjóli í AM-flokki og beltabifhjóli. Ökuskírteini fyrir A2-flokk má veita þeim sem er orðinn 18 ára.
4. A-flokkur: Réttindi til að stjórna bifhjóli á tveimur hjólum, með eða án hliðarvagns, með slagrými yfir 50 cm3, sé það búið brunahreyfli og hannað til hraðari aksturs en 45 km/klst. á þremur eða fleiri hjólum með afl meira en 15 kW, jafnframt réttindi til að stjórna bifhjóli í A1- og A2-flokki, léttu bifhjóli í AM-flokki og beltabifhjóli. Ökuskírteini fyrir A-flokk má veita þeim sem er orðinn 20 árs með því skilyrði að hann hafi a.m.k. í tvö ár haft ökuskírteini fyrir A2-flokk eða hann sé orðinn 22 ára og hafi lokið námi og prófi fyrir A-flokk.

Rökstuðningur: Með því að hafa aldurinn á þennan veg er komið samræmi á við hin Norðurlöndin og önnur lönd í Evrópu sem við viljum bera okkur við. Í 1. gr. laganna er sagt að jafnræðis sé gætt milli vegfarenda óháð samgöngumáta. Það er því réttlætismál að hækka ekki aldursmörkin á bifhjólaprófinu um þrjú ár á meðan bílprófsaldurinn er aðeins hækkaður um 1 ár. Eðlilegast er að þetta fylgist að. Þar að auki, með því að bæta við A1 flokknum og miða þau við 16 ár er komið millistigs réttindi milli skellinöðruprófsins og bílprófs/bifhjóls á vistvænu farartæki sem tekur minna pláss í umferðinni. Erlendar rannsóknir hafa auk þess sýnt fram á að reynsla sem fæst af akstri 125 rsm hjólum skilar sér síðar meir í færri slysum á stærri hjólum.

67. gr. Æfingaakstur.
Nemanda í grunnökunámi sem hlotið hefur nauðsynlegan undirbúning á vegum ökuskóla er heimilt að æfa akstur bifreiðar með leiðbeinanda í stað ökukennara, enda hafi leiðbeinandinn fengið til þess leyfi lögreglustjóra. Engum má veita leyfi sem leiðbeinanda nema hann:
a. hafi náð 24 ára aldri,
b. hafi gild ökuréttindi til að stjórna þeim flokki ökutækja sem æfa á akstur með og hafi a.m.k. fimm ára reynslu af að aka þannig ökutæki,
c. hafi ekki á undangengnum tólf mánuðum verið sviptur ökuleyfi.
Leyfi skal gefið út á nafn nemanda og leiðbeinanda og til tiltekins tíma, mest fimmtán mánaða. Leyfið fellur sjálfkrafa úr gildi þegar nemandi hefur öðlast ökuréttindin.
Heimilt er að afturkalla leyfi ef sérstaklega stendur á. Leiðbeinandi skal hafa leyfið meðferðis við æfingaakstur og sýna það þegar lögreglan krefst þess.
Bifreið sem notuð er til æfingaaksturs með leiðbeinanda skal sérstaklega auðkennd til æfingaaksturs.
Óheimilt er að nota merkið við annan akstur en æfingaakstur með leiðbeinanda.
Æfingaakstur á bifhjóli skal fara fram á lokuðu, afmörkuðu aksturssvæði þar sem ekki er önnur umferð og leiðbeinandinn getur haft stöðugt eftirlit með nemandanum og veitt honum nauðsynlegar leiðbeiningar.
Æfingaakstur skal fara fram með hliðsjón af þjálfun nemandans og leiðbeiningum sem Umferðarstofa gefur út. Um æfingaakstur með leiðbeinanda gilda að öðru leyti, eftir því sem við á, ákvæði 66. gr.
Leiðbeinanda er óheimilt að taka endurgjald fyrir starf sitt.

Tillaga: „Við æfingaakstur á bifhjóli skal leiðbeinandinn fylgja nemandanum eftir í öðru ökutæki, helst bifhjóli, og vera í stöðugu sambandi við hann í gegnum fjarskiptabúnað. Fari æfingaakstur fram á svæði þar sem ekki er önnur umferð getur leiðbeinandinn verið kyrrstæður og haft stöðugt eftirlit með nemandanum og veitt honum nauðsynlegar leiðbeiningar gegnum fjarskiptabúnað.“

Rökstuðningur: Nemandi í æfingaakstri hefur ekki næga þekkingu, reynslu eða sértæka þjálfun til að vera með farþega. Leiðbeinandinn hefur í fæstum tilfellum reynslu til að hafa áhrif á akstur hjólsins sitjandi aftan á því. Ekki er gert ráð fyrir neinum stjórnbúnaði á hjólið fyrir leiðbeinandann né heldur talsambandi. Betri aðstæður væru þær að leiðbeinandi myndi fylgja á öðru faratæki, helst bifhjóli, með góðan fjarskiptabúnað.

75. gr. Öryggis- og verndarbúnaður á bifhjólum.
Hver sá sem er á ferð á bifhjóli eða öðru vélknúnu ökutæki sem er opið og án verndarbúnaðar skal nota hlífðarhjálm ætlaðan til slíkra nota. Ökumaður ber ábyrgð á að farþegi noti hlífðarhjálm.
(Ökumaður og farþegi sem falla undir 1. mgr. skulu nota annan hlífðarfatnað og búnað við akstur eftir því sem við á.)
Eigi er skylt að nota hlífðarhjálm við akstur bifhjóls á bifreiðastæði eða við bensínstöð, viðgerðarverkstæði eða svipaðar aðstæður.
Hver sá sem situr í sæti bifhjóls sem búið er öryggisbelti og veltigrind skal nota beltið þegar bifhjólið er á ferð.
Ráðherra setur í reglugerð nánari ákvæði um flokkun, gerð og notkun hlífðarfatnaðar og annars hlífðarbúnaðar ökumanns og farþega bifhjóls og vélknúins ökutækis án verndarbúnaðar. Ráðherra getur sett ákvæði í reglugerð um undanþágu frá notkun hlífðarhjálms við sérstakar aðstæður.

Tillaga: Önnur málsgrein falli út með öllu
Tillaga: „Ráðherra setur í reglugerð nánari ákvæði um flokkun og kröfur til hlífðarfatnaðar og annars hlífðarbúnaðar ökumanna og farþega bifhjóla og annarra vélknúinna ökutækja án verndarbúnaðar, m.a. um undanþágu frá notkun hlífðarhjálms. Ráðherra getur sett nánari ákvæði um notkun lágmarkshlífðarfatnaðar við aksturs bifhjóla í atvinnuskyni eða til aksturskeppna. Þá getur ráðherra sett þar um notkun hlífðarhjálms við hjólreiðar.“

Rökstuðningur: Lög um notkun hlífðarfatnaðar á bifhjólum eru hvergi að finna á Norðurlöndunum eða löndum Evrópu. Í Noregi var það rætt að setja lög í þessa veru en fallið var frá þeim hugmyndum og eru lögin þar til samræmis við önnur Evrópulönd. Lögin hér ganga því mun lengra heldur en í löndunum sem við miðum okkur við. Auk þess er veðrátta hér á landi þannig að hlífðarfatnaður er nauðsynlegur til að verjast kulda og bleytu og því er notkun þeirra nánast sjálfsögð.
Til samræmis við það að önnur málsgrein falli út þarf síðasta málsgreinin að breytast. Ráðherra getur þá sett í reglugerð ákvæði um hlífðarfatnað atvinnuökumanna á borð við Lögregluna, sendla og sértæka sjúkraflutningamenn.
Á vorfundi FEMA (Federation of European Motorcyclists' Associations), en Sniglar eru aðilar að þeim samtökum, var samþykkt ályktun þar sem lögum og skyldunotkun hlífðarfatnaðar er mótmælt. Stefna FEMA er að hvetja til notkunar hlífðarbúnaðar en eru á móti því að skylda almenna bifhjólamenn til að notkunar hlífðarbúnaðar.