Bifhjólasamtök lýðveldisinns Sniglar

Eitt af því sem að Evrópusambandið ætlar að koma á fljótlega er svokölluð gerðarviðurkenning mótorhjól (Type Approval) en þar sem við erum EES land þurfum við að taka þá reglugerð inn í okkar lög eins og önnur Evrópulönd. Margt hefur verið spáð og spjallað um hvað verði ofan á í þessu efni og eitt af því sem heyrst hefur er að 100 hestafla hámark sé möguleiki, þótt fjarlægur sé. Líklegra er þó talið að annars konar skyldubúnaður verði innleiddur eins og ABS hemlalæsivörn og samtengdar bremsur. Ástæða er fyrir íslenskt mótorhjólafólk að hafa áhyggjur af þessu þar sem að ABS hemlalæsivörn er ekki alltaf æskileg á íslenskum vegum, en meira en helmingur þjóðvegakerfis okkar er á möl.

Það sem er að gerast í augnablikinu er að Evrópusambandið er að vinna að tillögu fyrir Evrópuþingið að kjósa um. Tillaga þessi á að vera tilbúin fyrir sumarið og kosningin á að fara fram eins fljótt og hægt er. Vegna þessa eru samtök eins og FEMA og ACEM (samtök mótorhjólaframleiðanda) að vinna í bakherbergjum í Brussel eins og hægt er. En er þetta eitthvað til að hafa áhyggjur af? Já, segja þeir sem vinna að þessu. Tillaga þessi getur breytt miklu fyrir mótorhjólafólk í Evrópu, bæði til hins betra og til hins verra. Vandamálið er helst það að margir koma að þessu, ekki bara hagsmunasamtök mótorhjólafólks heldur líka aðrir hagsmunahópar og því er mjög erfitt að spá í hver endanlega útkoman verður. En eru þá einhverjir kostir við þetta? Já, einn af þeim er að sambandið vill gera upplýsingar um CO2 innihald hjóla að skyldu fyrir framleiðanda að upplýsa neytendur um, en einhverra hluta vegna gera þeir það ekki í dag. Þetta skiptir máli í nokkrum Evrópulöndum þar sem að minni mengun þýðir minni skattlagningu á viðkomandi.

Eins og áður sagði vill sambandið skylda notkun bremsubúnaðar eins og ABS og samtengdar bremsur, sem bæði geta minnkað áhættu í mörgum tilvikum. Nýjustu tölur frá Þýskalandi renna stoðum undir það. Gerð var rannsókn á mótorhjólaslysum þar og niðurstaðan var sú að 160 mannslíf gætu bjargast á ári hverju ef öll mótorhjól þar í landi væru með ABS hemlalæsivörn. Eins var niðurstaðan að 6900 slys hefðu alls ekki orðið ef sú væri raunin. FEMA hefur sett sig á móti þessu fyrir þá ástæðu að ABS sem staðalbúnaður mun hækka verð mótorhjóla talsvert. Algengt er að búnaður sem þessi hækki verð hjólanna um 1-200.000 kr í Evrópu svo hækkunin yrði enn meiri hér. Annar þáttur í þessu er sá að hugsanlega er þessi búnaður ekki orðinn nógu þróaður í mótorhjólum. Í nýjasta tölublaði Motorrad í Þýskalandi voru nokkur 1000 rsm hjól bremsuprófuð og kom þar í ljós að hjól án ABS (Kawasaki ZX-10R) bremsaði betur á mikilli ferð en önnur hjól með ABS eins og hið nýja BMW S1000RR.

100 hestafla hámarkið kemur reglulega upp í umræðum sem þessum enda er þetta hámark enn við lýði í Frakklandi. Þetta hljómar ósköp vel í eyrum leikmanns, minna afl hlýtur að þýða fækkun slysa, eða hvað? Viðamikil könnun í Noregi fyrir rúmum áratug sýndi að það eru tengsl á milli áhættu af akstri mótorhjóla og ákveðinna hópa mótorhjólafólks en engin bein tengsl við afl mótorhjóla í slysum almennt. Sem dæmi um þetta er 110 hestafla Kawasaki ZX7 tíu sinnum líklegra til að lenda í slysi en 150 hestafla ZZR1100. Tengslin við slysin eru semsagt hverjir keyra hjólin, en í seinna tilvikinu var venjulega um reyndari ökumenn að ræða. Þótt 100 hestafla hámark hafi verið við lýði í Frakklandi í tvo áratugi hefur það ekkert gert til að fækka slysum þar í landi.

Skellinöðrur í Evrópu eru takmarkaðar við 45 km hámarkshraða og 125 rsm hjól (A1) mega ekki vera öflugri en 15 hestöfl. Vegna þess eru í gildi ströng viðurlög við “fikti” sem bannar eigendum að eiga eitthvað við afl hjólanna. Samtök framleiðenda ACEM hafa nú lagt til að það sama gildi um flokk A2 sem eru mótorhjól takmörkuð við 35 hestöfl. FEMA óttast að með þessu sé verið að opna ormagryfju sem endi með banni við fikti á öllum gerðum mótorhjóla. Eigendur þyrftu þá að láta viðurkennt verkstæði sjá um allt sem viðkemur viðhaldi hjólanna og enginn má lengur velja hvaða dekk hann setur undir hjólin sín ef svo færi.

Skoðun mótorhjóla er mismunandi eftir löndum og sum lönd eins og Holland leyfa að ekki þurfi að skoða mótorhjól. Evrópusambandið vill einhverja leið til að sannreyna að mengunarmörk mótorhjóla haldist meðan hjólið er í notkun og ACEM leggur til að það sé gert með tölvubúnaði í mótorhjólunum sem hægt er að lesa á einfaldan hátt þegar hjólið fer í skoðun. Útkoman er einfaldlega sú að kostnaðurinn við slíkt flyst yfir á mótorhjólaeigandann og hann þarf að greiða fyrir meira viðhald til að viðhalda þessum mengunarmörkum. FEMA leggur til að framleiðendum verði gert að tryggja að mótorhjól haldi mengunarmörkum sínum í ákveðinn líftíma, eins og 50.000 km.

Staðreyndin er sú að ný tillaga um gerðarviðurkenningu mótorhjóla mun líta dagsins ljós bráðlega og kosið verður um hana á árinu. Líklegt er talið að lögin muni gilda frá og með árinu 2012. Hver endanleg útkoma verður ræðst á síðustu vikunum eftir mikinn lobbísima. Það að samtök framleiðenda og samtök neytenda séu ekki á sama máli í mörgum atriðum mun ekki hjálpa. Við hérna uppi á litla Íslandi þurfum að sitja þegjandi hjá og innbyrða ósköpin hver sem niðurstaðan verður.