Bifhjólasamtök lýðveldisinns Sniglar

Tryggingar á bifhjólum hefur lengi verið málaflokkur sem hulinn hefur verið hálfgerðu skýi, lítið samræmi hefur verið á milli grunnverðs og þess sem verið er í raun að borga, verðmunur á milli manna og / eða hjólagerða virðist meira byggjast á því hversu góðir menn eru að „semja“ um iðgjöld sín fremur en aldri og / eða reynslu af akstri bifhjóla. Eitt af því sem vantað hefur er gott yfirlit og tölfræði yfir stöðu tryggingamála og hver er hinn raunverulegi kostnaður við að tryggja bifhjól.

Í sumar byrjun stóðu sniglar fyrir könnun meðal bifhjólafólks um hver kostnaður við tryggingar væri. Könnunin stóð frá byrjum maí fram í miðjan júní og bárust svör frá 581, könnunin ætti því að vera nokkuð marktækt úrtak á meðal bifhjólafólks.

Við frum skoðun gagnanna má sjá að meðalgreiðsla bifhjólamanns fyrir eitt bifhjól er um 88.843 kr á ári, óháð því hvort um kaskó er að ræða eða ekki. Miðað við að 9.420 létt og þung bifhjól voru á skrá samkvæmt upplýsingum umferðarstofu um síðust áramót eru heildar greiðslur fyrir tryggingar bifhjóla 836.898.719 Kr á ári, (Ef tekin eru með þau 7.996 torfæru og fjórhjól sem á skrá voru  á sama tíma er þessi upphæð rúmlega einn og hálfur miljarður.) Heildar velta hjólafólks með öðrum tryggingum svo sem bíla, húsnæðis og öðrum tryggingum má áætla milli fimm og  sex miljarða á ársgrundvelli.

Bilið á milli hæstu og lægstu uppgefnu tölu á tryggingum  er líka umtalsverður en lægsta uppgefna greiðsla er 10.000 kr en hæsta 240.000 kr á árs grundvelli. Þessar tölur eru svo ekki í neinu samræmi við „uppgefin“ grunn verð tryggingafélaganna sem eru á milli sex- og sjöhundruð þúsund.

Markmið könnunarinnar var að skapa tölfræði sem hægt væri að byggja á og bera saman við tryggingar á bifhjólum í löndum í kringum okkur, en á tengslaneti FEMA liggur fyrirspurn frá Sniglum þess efnis.

Á næstunni verða gögn könnunarinnar unnin og niðurstöðurnar birtar í skýrslu um tryggingamál bifhjólafólks en fram að því munum við birta hér á vefnum úrdrætti. Sniglar kalla ennfremur eftir viðbrögðum og samstarfi við tryggingarfélögin um bætt fyrirkomulag, og sanngjarna verðlagningu trygginga í þessum flokki. 

Undanfarna mánuði hefur verið unnið að verkefninu Með rísandi sól. Nú er verkefninu lokið og afurðin birtist hér. Niðurstöðurnar hafa upplýsinga- og þekkingarlegt gildi og framtíðarsýn bifhjólaeiganda er áhugaverð.

Kæru félagar, kynnið ykkur niðurstöðurnar! Þær endurspegla hverjir eru íslenskir bifhjólaeigendur, hvar þeir eru staddir á vettvanginum og hvernig bifhjólamenn þeir eru. Jafnframt fela niðurstöðurnar í sér hvert bifhjólaeigendur vilja sjá bifhjólavettvanginn þróast til framtíðar.

Með hjólakveðjum,

Þórdís Rafnsdóttir
Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það.
Yamaha XT 660

Alþjóðlegi „Hjólað“ í vinnuna dagurinn (Internatunal Ride to work day)

„Hjólað“ í vinnuna dagurinn er alþjóðlegur viðburður sem haldinn er um allan heim þriðja mánudag í  júní ár hvert. Markmið dagsins er að minna á að mótorhjól eru hagkvæmari og umhverfisvænni kostur sem ferðamáti til og frá vinnu. Mótorhjól og vespur eyða mun minna eldsneyti, slíta gatnakerfinu umtalsvert minna og taka minna pláss í umferð og á bílastæðum svo eitthvað sé nefnt. Á mánudaginn kemur 21. Júní mun mótorhjólafólk um allan heim nota mótorhjól eða vespur sem farartæki til og frá vinnu, Sniglar hvetja allt mótorhjólafólk á Íslandi til að taka þátt og nota hjólið til og frá vinnu þennan dag.  Á heimleiðinni á milli 17:00 og 18:00 er tilvalið fyrir þá sem eru í Reykjavík að koma við á Ingólfstorgi og sýna framtakinu lið og vera með á hópmynd.

 - að „hjóla“ í vinnuna er skemmtilegt.
 - að „hjóla“ í vinnuna skapar minni umferð og einfaldar bílastæða mál.
 - að „hjóla“ í vinnuna brennir minna eldsneyti en fólksbíll.
 - að „hjóla“ í vinnuna stuðlar að því að athygli mín og orka er í hámarki.
 - að „hjóla“ í vinnuna mengar minna en að fara á bílnum.
 - að „hjóla“ í vinnuna hefur minni áhrif á vegakerfið.
 - að „hjóla“ í vinnuna skilar mér í og úr vinnu á ánægjulegan hátt.
 - að „hjóla“ í vinnuna sýnir að mótorhjól er betri valkostur sem farartæki í borgarumferð.

www.sniglar.is  –  www.ridtowork.org

Á vorfundi FEMA sem haldinn var í Genf 29. maí síðastliðinn var beiðni Snigla um endurkomu að samtökunum tekin fyrir. Var tekið vel í beiðnina og hún samþykkt og eru því Sniglar nú fullgildir meðlimir í FEMA. Á fundinum var einnig borin upp ályktun þar sem hlífðarfatalögunum hér á landi var mótmælt. Var ályktunin samþykkt samhljóða.

Í ályktuninni er bent á það að ekkert evrópuland hefur lög í þessa veru enda ekki til alþjóðlegir staðlar til að styðjast við þegar það er skilgreint hvað sé réttur hlífðarfatnaður. Ályktunin er svohljóðandi: „FEMA, the body of 25 national motorcycle organizations from 20 European countries, strongly opposes the intention of the Icelandic government to confirm a law which calls for mandatory protective clothing for motorcycle riders. No European country has such a law. The reason is simple, no international standard exists for protective motorcycle clothing and therefore it is not possible to implement them in any law or body of laws.“

Með aðild að FEMA opnast Sniglum góður stuðningur frá aðildarlöndum FEMA í baráttumálum eins og gegn hlífðarfatalögunum. Einnig fá Sniglar gott aðgengi að upplýsingum sem auðveldar allt forvarnarstarf og hjálpar til við undirbúning umferðarátaka. Og ekki má gleyma að nú heyrist rödd okkar þegar kemur að því að hafa áhrif á lagasetningar Evrópusambandsins en reynsla okkar af t.d. malarvegum kemur að góðum notum þegar lög um hluti eins og ABS bremsukerfi í mótorhjólum eru rædd.

Í byrjun maí fengu Sniglar beiðni frá Nefndarsviði Alþingis um að veita umsögn um tillögu til þingsályktunar um fjögurra ára samgönguáætlun fyrir árin 2009–2012. Þegar farið var að skoða tillöguna kom í ljós að hvergi var minnst á bifhjól í henni. Umferðarnefnd Snigla fannst það skjóta skökku við að ekki skildi vera minnst á bifhjól í tillögunni þrátt fyrir að bifhjól á landinu séu um 7% af ökutækjum í umferðinni. Til að bæta úr því lögðu Sniglar til að orðinu bifhjóli yrði bætt við í klausu um það að breyta eigi skattlagningu eignarhalds og notkunar neyslugrannra og vistvænna farartækja. Einnig var lagt til að í kafla 1.4, markmið um öryggi í samgöngum, yrði bætt við nýjum lið sem væri á þessa leið, „Unnið verið markvisst að því að tryggja óvörðum vegfarendum öryggi eins og best verður á kosið í umferðinni, þ.e. bifhólafólki, reiðhjólafólki og öðrum sem kjósa að nota umhverfisvænan fararmáta.“ Með þessu vill umferðarnefnd Snigla skerpa á öryggismálum bifhjólamanna og annara sem nýta sér umhverfisvænan fararmáta. Nú í byrjun júní voru svo fulltrúar Snigla boðaðir á fund Samgöngunefndar þar sem farið var yfir þessar tillögur og ýmsar leiðir til að bæta öryggi bifhjólafólks voru ræddar. Þeir sem vilja kynna sér þingsályktunartillöguna geta fundið hana á vef alþingis. Umsögn Snigla er svona að finna hér fyrir neðan.

Sæl öll, nú er verkefninu "Með rísandi sól" lokið og niðurstöðurnar verða kynntar á opinni ráðstefnu næstkomandi föstudag, 21. maí á Hótel Sögu kl.

13:05 í Stanford salnum. Fyrirlesturinn tekur um 15 mín.

 

Ráðstefnan er öllum opin og bifhjólafólk er hvatt til að koma og kynna sér niðurstöður verkefnisins sem fela í sér framtíðarsýn bifhjólaeigandans og hugmynd að framtíðarskipulagi.

 

Vonandi sjáum við sem flesta - þetta er afurðin okkar allra bifhjólaeigenda!

 

Með bestu kveðju,

 

Þórdís Rafnsdóttir

Meistaranemi í verkefnastjórnun HÍ

Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það.

Sjálfsagt lítur stjórnsýslan svo á málin að þetta sé okkar hugsunarháttur, „bara ef það hentar mér“, en raunin er sú að svo er ekki í pott búið hjá okkur bifhjólafólkinu. Ég held að flest okkar séum sammála um að klæðast vel, klæðast fyrir fallið og allur þessi söngur! En á hinn bóginn viljum við eiga val þegar kemur að kaupum hlífðarfatnaðar. Flóra hjólafólks er breið og það sem ekki hentar mér á Harley, hentar fínt fyrir Gauja á Kawanum og svo öfugt. . .  Vesenið er að gallinn hans Gauja er sennilega í náðinni hjá stjórnsýslunni og þarf þar af leiðandi líka náð hjá tryggingafélögum, á meðan gallinn minn er það ekki þótt framleiðslumarkmið og þol gallanna sé þau sömu.

Til að byrja á byrjuninni þá fór af stað vinna innan samtakanna fyrir nokkrum misserum. Ég efa ekki að farið hafi verið af stað með góðum hug, sér í lagi með tilliti til tolla og vörulækkunar á hlífðarfatnaði bifhjólafólks. Kannski er ekki réttlátt að gagnrýna þessa vinnu á þeim grundvelli að hugurinn hafi verið góður, en traustar stoðir standa ekki uppi, með góðan hug einan að vopni í svona veigamiklum málum. Lámarkskröfur til fólks sem ganga í slík verkefni eins og breytingar á lögum hlífðarfatnaðar er: Þekking á fatnaði, stöðlum, akstri bifhjóla og stjórnsýslukerfinu! Þessum kröfum var ekki fullægt, frumvarpið var ekki yfirfarið, það var ekki lagt fyrir aðalfund Snigla og það fékk ekki réttláta meðferð inn á þing og naut ekki þeirrar athygli sem það þarfnaðist inn á þinginu.

Þrotlaus vinna hefur legið á Umferðarnefnd Snigla í 2 ár til að lagfæra þessi mistök. Um mitt ár í fyrra töldum við sem sitjum í Umferðarnefnd við hafa unnið sigur í þessu máli. Mikil og náin samvinna við Samgönguráðuneytið og stjórnsýsluna skiluðu okkur að samgönguráðuneytið féllst á kröfur okkar um að draga þetta frumvarp til baka á þeim forsendum að ekki væri vegur að vinna eftir þeim og var það því mikið áfall þegar nefnd innan samgönguráðaneytis felldu kröfur okkar út og skiluðu frumvarpi á 75. gr breyttu. Svör Samgönguráðuneytis voru þau að „ekki þótti gerlegt að fella þetta úr lögum á þeim forsendum að telja mætti að ráðuneytið væri með því að senda út röng skilaboð til þjóðfélagsins. Skilaboð um að hlífðarfatnaður væri óþarfur. Ég get svo sem skilið sjónarmið ráðuneytisins í þessu máli, þetta er auðvitað algjör U-beygja sem erfitt er að útskýra, bæði fyrir stjórnsýslu og þjóðfélaginu sjálfu!

Nú eru nýju umferðarlögin komin inn á borð Alþingis og 1. umferð búin. Okkar staða nú er að herja á Alþingi um breytingar,  ósk um að verða umsagnaraðilar að frumvarpinu og reyna af öllum mætti að lágmarka skaðann fyrir bifhjólafólk og í kjölfarið að draga úr völdum tryggingafélaga að skerða bótarétt okkar þegar til slysa koma. Auðvitað er það hneisa að stjórnsýslan skuli þvinga okkur til aðgerða í þessu máli, það er hneisa að stjórnsýslan skuli með forsjáhyggju setja okkur í tvísýna stöðu gagnvart bótarétti okkar. Kannski spyr sig einhver sem ekki gerir sér grein fyrir alvarleika málsins – hvað er vandamálið?  Af hverju vil fólk ekki setja hlíðfarfatnað í lög rétt eins og hjálmaskyldu og beltanotkun? Svar við því er einfalt. Staðlakerfi öryggisfatnaðar ætlaður til bifhjólaaksturs allstaðar í heiminum, er meingallað þótt fatnaður sjálfur fái fullt hús stjarna og þegar kemur að reglugerðasmíðum um hvað flokkast til hlíðfarfatnaðs hvort sem það er lámarks fatnaður eða ekki er raunveruleg hætta á að reglugerðin valdi því að úrval hlíðfarfatnað, bæði þeir gallar sem við eigum og höfum keypt fyrir stórfé, gallar sem okkur mun hugnast að versla og nota, séu ekki samkvæmt reglugerð.

Hlífðarfatamálið er ekki það eina sem getur njörvað réttindi okkar, tillaga um bann við „smærri einstaklingar en 150 cm mega ekki sitja á bifhjóli“, og hækkun prófsaldurs upp um 3 ár! Hér á landi er lögræðisaldur 18 ár, við 18 ára aldur máttu gifta þig, taka lán, kaupa hús og gera það sem hugur og geta girnist – nema að keyra mótorhjól! Um tvítugt máttu fara í ríkið og versla þér áfengi og annan mjöð – en þú mátt ekki keyra mótorhjól!

Akstur bifhjóla er hættulegur, á því leikur enginn vafi.
En 300 hestafla bíll er líka hættulegur ef ekki hættulegri en 60 – 70 hestafla bifhjól. Það er ekki með nokkru móti hægt að skilja hvers vegna það eru sett takmörk á bifhjólaréttindi en ekki bifreiðar.

Bifhjól flokkast undir sama hatt og fólksbíll – ökutæki!

Kveðja Inda Björk #1015
Formaður Umferðarnefndar.

Ný umferðarlög voru lögð til fyrstu umræðu fyrir alþingi í dag. Nokkur hópur hjólamanna var mættur við alþingishúsið um hádegi og tyllti sér á pallana til að hlusta á umræðurnar. Samgönguráðherra lagði frumvarpið fyrir og eftir að hann hafði lokið máli sínu tóku við andsvör og umræður að hætti þingheims. Gaman var að heyra á fyrirspurnum til ráðherra hvað mótorhjólafólki hefur tekist þokkalega upp síðustu daga að vekja athygli á málstað sínum, en nánast allir sem í pontu stigu nefndu hlífðarfatnað mótorhjólafólks, eða önnur af þeim málefnum sem við höfum verið að benda á. Að lokinni umræðu var frumvarðið sent til annarar umræðu og til samgöngunefndar til umfjöllunar og umsagnar.

Skoða má umræður um frumvarpið hér:

Umferðarlög

Ef þú/þið eruð á hjólinu ykkar í dag (06.05) væri það ekki úr vegi að skreppa í hádeginu niður á Austurvöll og mótmæla umferðarlögunum. Þau eru nú til 1 . umræðu á Alþingi kringum hádegið og mikilvægt að láta í sér heyra núna áður en málið fer fyrir nefnd aftur og í breytingartillögur. Sendið þetta á alla sem þið þekkið á mótorhjóli.....Hjólafólk vill ekki að mótorhjólaprófið fari í 22 ár, að við fáum ekki að reiða neinn undir 150 sm og að við verðum skikkaðuð til að klæðast þeim hlífðarfatnaði sem ríkið áskilur og telur við hæfi!

Núna er tækifæri til að láta aðeins í sér heyrast !

Frá árinu 2005 hef ég tekið saman gróflega tölur um gjöld sem mótorhjólafólk greiðir í ríkissjóð af innflutningi og að nota hjólin sín. Sem fyrr er samantektinni skipt í 5 flokka.  

Hjá Hagstofu Íslands er greiningarflokkur um vélhjólasölu viðgerðir vélhjóla og varahlutasölu , það sem virðist vanta inn í þessa útreikninga hjá Hagstofunni við fyrstu sýn eru þeir liðir í rekstri mótorhjóla sem mest er skattlagður þ.e.a.s.  bensín, dekk og öryggisfatnaður. Hlífðarfatnaður er mjög hátt skattlagður og er nú bundið í lög að klæðast hlífðarfatnaði í almennri umferð og við æfingar og keppnir í mótorhjólaíþróttum. (Við getum verið stolt af forvörnum mótorhjólafólks sjálfs í garð hvors annars, en sennilega er slysatíðni bæði torfæruhjólafólks og götuhjólafólks á Íslandi með lægsta móti í heiminum. Til er alheimsstöðull um dánartíðni mótorhjólafólks sem er að einn af hverjum 1080 mótorhjóla-ökumönnum lætur lífið árlega. Miðað við tölur síðustu 10 ár er talan á Íslandi rokkandi á bilinu 1 af hverjum 2000 lægst og besta árið var á síðasta ári 1 af 4500). 

Hagstofan tekur væntanlega þessa þrjá liði (bensín, dekk og hlífðarfatnað) með hagtölum í öðrum liðum hjá sér, en ég tek þessa liði með og reyni að fá sanngjarnt meðaltal út úr því þessir liðir eru hluti af mótorhjólarekstri .

Samkvæmt upplýsingum frá fyrirtækjasviði N1 var meðalverð á 95 oktan bensínlíter rúmar 170 krónur 2009, en af 170 krónu líters verði innheimtir ríkið af olíufélögunum 91 krónu í ríkissjóð. 

Töluvert var til hjá umboðsaðilum af mótorhjólum um áramótin 2008 og 2009 ásamt allnokkrum hjólum sem einstaklingar höfðu flutt til landsins í lok góðærissins og voru óskráð, en forskráð í vöruhúsum eða tolli og þrátt fyrir svokallaða kreppu var töluverður innflutningur á nýjum og notuðum mótorhjólum 2009. Samkvæmt tölum frá U.S. var fjölgunin á skráningu mótorhjóla 2009 um 961 hjól, en óvenju mikið var afskráð eða flutt úr landi sem var alls 127 hjól, en samkvæmt upplýsingum frá Hagstofu voru 75 mótorhjól flutt úr landi á síðasta ári og miðað við það þá hafa verið afskráð 52 hjól. 

1. Torfæruflokkur (fjórhjól, tvíhjól):  Þrátt fyrir allt krepputal þá var ótrúleg fjölgun í þessum flokki á síðasta ári ( hjólin sem eru í þessum flokki eru á rauðum númerum og því ekki leyfð á öðrum stöðum en í brautum og á einkalandi og þarf því að koma hjólunum á staðinn með bíl /kerru ), en  fjölgunin var  430 torfæruskráð hjól á síðasta ári. Iðkendur jafn margir og skráð torfærutæki sem eru  7,996, en meðalnotkun torfæruhjóla hefur verið um 3000 km. á ári, en eftir að hafa skoðað hjólamarkaðinn á árs gömlum torfæruhjólum virðist meðalakstur á hjólunum hafi minkað niður í um 2,500 km.( klukkuhjólin eru mikið á 70-90 klukkutímum árs gömul, en meðalhraði torfæruhjóla í brautum er mjög nálægt 30 km. á kl., ástæðu minni aksturs tel ég tvíþætta: annars vega ekki Klausturskeppni 2009 og svo minni fjárráð). Meðaleyðsla torfæruhjóla er um 7 lítrar á 100 km. Þetta gerir meðaltal 175 lítrar af bensíni x 7996= 1.399.300 lítrar af bensíni á hjólin X 91 = 127,336,300 (það er bundið í lög að 37 krónur og 7 aurar af hverjum bensínlíter á að fara í vegagerð og vegabætur, hækkaði á síðasta ári úr 32,95 í 37,07 samkvæmt upplýsingum frá N1, en samkvæmt tölunum er torfærufólk þá að borga alls 51,872,051 í vegagerð og vegabætur á síðasta ári. Hvar eru vegirnir fyrir torfæruskráðu hjólin?). Að meðaltali eru notuð 2-3 afturdekk á ári og 1-2 framdekk og í varahluti og olíuvörur fer að jafnaði 50,000 hjá hverjum (tannhjól, keðja, bremsuklossar og fl.) . Viðhald á mótorhjólagalla á hverju ári 30,000, samtals 80,000= í ríkissjóð 19.600x 7996= 156.721.600 (almennt er torfæruhjólafólk á Íslandi til fyrirmyndar hvað varðar öryggisbúnað við akstur torfærumótorhjóla, en töluvert vantar upp á að þeir sem aka fjórhjólum séu í ásættanlegum klæðnaði við akstur fjórhjóla).  Í samantektinni í ár tek ég ekki inn í notkun á bensíni fyrir bíl sem dregur hjólið á akstursstað eins og undanfarin ár.

Samtals í ríkissjóð (virðisaukaskattur,tollur og bensíngjald) 284.057.900.

2. Götuhjólaflokkur: Um síðustu áramót voru 9,420 bifhjól í landinu, en hluti af þessari tölu eru fjórhjól sem hafa götuskráningu og skellinöðrur (stór bifhjól 7,111 og létt bifhjól 2,309) og ef reiknað er með því að meðalakstur götuhjóls árlega sé 3000 km og eyðslan sé 7 lítrar á hverja 100km ekna eða um 210 lítrar af bensíni á ári = 210 X 9420 = 1.978.200 lítrar X 91 = 180,016,200 (þess ber að geta að létt bifhjól eyða ekki svona miklu, en fjórhjólin eru nánast öll að eyða á bilinu 10-20 lítrum á hundraðið svo að þetta ætti að vera nokkuð í jafnvægi). Viðhaldskostnaður á hvert hjól er um 50.000 í olíu, bóni, dekk og fl. en galla og aukahlutakaup sé um 30,000, samtals 80.000= í ríkissjóð 19.600X9.420=184.632.000.

Samtals fyrir notkun í ríkiskassann (tollur,bensíngjald og virðisaukaskattur) 364,648,200.

3. Mótorhjólakeppnisflokkur: Þessi flokkur er reiknaður þannig að haldnar eru 10 aðal keppnir, keppandafjöldi er jafnaður út með því að hafa meðaltal 110 keppendur (þess eru dæmi um að keppendur í keppni hafi farið niður í um 80 og upp í 130, en til að auðvelda hlutina þá tek ég meðaltalið 110 keppendur og 10 keppnir þrátt fyrir að keppnirnar séu nær 20 en 10 að ísaksturskeppnunum meðtöldum). Í hverja keppni eru notaðir 10 l. af bensíni, en til að geta keppt þarf keppandinn að æfa sig mikið og notar á hjólið 90 lítra til viðbótar og jafnast þá að keppnirnar eru 10X100X110X91=10.010.000. bensínskattur hjólanna, en til að komast á æfingar og keppnir þarf að draga hjólið á báða staðina og notar bíllinn 200 l. að jafnaði á hverja keppni + æfingar. Þá lítur jafnan út svona sem reiknað er eftir 110X200X10X91=20.020.000. (hér er bíll notaður í samantektina þó svo að ekki sé reiknað bensín á bíl í flokki 1 um torfæruskráð hjól) . Keppnismenn fara að jafnaði með í galla og varahluti, líkamsræktarkort og annann kostnað við æfingar ásamt því að mjög margir fara í sérstakar æfingarbúðir erlendis og má gera ráð fyrir að hver keppnismaður fari með um 300,000 á ári í þessa liði og borga virðisaukaskatt af því og þá gæti sú reikningsformúla litið svona út: 110X60.000=6.600.000 .

Samtals borga keppnismenn í mótorhjólakeppnum þá fyrir það eitt að keppa fyrir utan kaup á hjólinu (tollur,virðisaukaskattur og bensíngjald) 36.630.000. 

Allar tölur í þessum flokki eru að sögn þeirra sem stunda keppnissport  töluvert of lágar og mætti allt að því tvöfalda eða þrefalda allar tölur sérstaklega varðandi dekk og olíuvörur sem hefur hækkað gífulega á síðustu árum.

4.  Ferðamannaflokkur: Árlega koma um 1000 mótorhjól til landsins sem ferðamenn og aka að jafnaði um 2500km á meðan þeir dvelja á landinu. Í skatt af bensíni borga þeir 15.925.000. miðað við 7l.  Í þennan lið er ekki áætluð önnur skattlagning á þessa ferðamenn sem kaupa ýmislegt annað en bensín og er stórlega vantalinn s.s. gisting, matur, og þjónusta. 

Því reiknast á þennan flokk bara bensínskattur kr. 15.925.000.

5. Nýinnflutt mótorhjól og fjórhjól 2009.: Mikið hrun var í innflutningi mótorhjóla á síðasta ári og voru flest umboðin að taka bara örfá hjól og jafnvel engin hjól og byggðu söluna á innflutningi allt frá 2007, en eitthvað var um einkainnflutning á notuðum hjólum. Sennilega var þetta í fyrsta skipti að flutt voru inn fleiri fjórhjól og sexhjól samanlagt heldur en tvíhjól á árinu 2009.    Samkvæmt upplýsingum frá Hagstofu Íslands voru flutt inn 222 tvíhjól, 194 fjórhjól og 53 sexhjól, samanlagt 469 hjól og voru greidd í ríkissjóð af þessum hjólum í vörugjöld kr. 308,513,294 (tollur) og af þessum sömu hjólum var greitt í virðisaukaskatt heldur hærri upphæð  339,364,623 kr.  miðað við meðalálagningu (fengnar voru tölur hjá þrem mótorhjólaumboðum og meðaltal tekið út frá því sem er 1,1, en síðustu tvö ár hefur álagning lækkað töluvert hjá öllum þeim sem haft var samband við) má þá margfalda vörugjöldin með 1,1 til að fá virðisaukaskatt af hjólunum. Fjölgun mótorhjóla um 469 hjól þurftu því mótorhjólamenn jafn marga  mótorhjólagalla og ef gert er ráð fyrir að meðalverð mótorhjólagalla sé 100,000 og ríkið fær í tolla og virðisaukaskatt af hverjum galla a.m.k. 30,000, þá gerir þetta 469 gallar sinnum 30.000 =  14,070,000.  Opinber gjöld af 469 hjóli og göllum er samanlagt kr. 661,947,917.                  
                     
Þessir 5 flokkar gera því alls til ríkissins í krónum 1,363,209,017.

Á öllu landinu eru skráð bifhjól alls: 9.420 stór hjól og skellinöðrur.
Torfæru skráð fjórhjól og mótorhjól voru: 7.996 um síðustu áramót.
Samtals voru þá skráð: 17.416 um  áramót 2009 og 2010.

Ef lagðar eru saman tölurnar á samantektunum 2005, 6, 7 ,8 og 9  þá er samanlögð tala sem mótorhjólafólk hefur borgað í skatta í ríkissjóð rúmir 13 milljarðar. Þá er bara að bera þá tölu við stóra framkvæmd á vegum ríkisins og segja: 
                     
“ÞETTA ER GREITT AF MÓTORHJÓLAFÓLKI”.

Hjörtur L. Jónsson     01.05.  2010.

P.S.         Ég hef fengið nokkra gagnrýni á að ég nefni þessa samantekt mína Mótorhjólaiðnaðinn vegna þess að engin framleiðsla er í gangi, en ástæðan er sú að mótorhjólafólk er í mínum huga að framleiða peninga í ríkissjóð. Í lið (1. Torfæruhjólaflokkur) nefni ég að notkun hafi minkað á torfæruskráðum hjólum og nefni þar að m.a. mætti rekja það til þess að Klausturskeppnin var ekki árið 2009, en í ár 2010 verður þessi keppni og nú þegar er fullbókað í keppnina. Það verður gaman að sjá á næsta ári hvaða áhrif þessi keppni hefur á meðalnotkun torfæruskráðra hjóla eftir ár. Einnig í sama lið hef ég sleppt að reikna bensín verðið á bílinn sem dregur hjólin á kerru á þá akstursstaði sem rauðnúmerahjól mega keyra á, en nú eru hjól meira en 400 fleiri og bensín dýrara og mundi heildartala samantektarinnar hækka um 70-80 milljónir við það. 

H.L.J.