Bifhjólasamtök lýðveldisinns Sniglar

Í dag var tilkynnt um hvernig aldurskiptingu á bifhjól verður háttað í Bretlandi frá og með næsta ári. Það er athyglisvert fyrir okkur hér á Íslandi því að Bretland er eitt af fáum löndum sem miðar við 17 ára aldurinn eins og við. Breytingin verður á þann hátt að frá 17-19 ára verður hægt að fá réttindi á flokk A1 sem eru 125 rsm hjól upp að 15 hestöflum. Við 19 ára aldurinn er hægt að taka próf á hjól upp að 47 hestöflum, sem er hærri hestaflatala en áður var leyfð fyrir A2 flokk sem var áður í 35 hestöflum. Taka þarf A2 prófið á hjól sem er 395 rsm og 33 hestöfl að lágmarki. Það er því fyrst mögulegt að taka full réttindi við 21 árs aldurinn ef búið er að taka stigskiptingu réttinda, en þeir sem hafa náð 24 ára aldri geta tekið full réttindi strax. Þeir verða þá að gera það á mótorhjól sem er 595 rsm að lágmarki og 54 hestöfl. Til að hækka sig um flokk þarf að öllum líkindum að taka próf, eða lágmarkstíma sem þýðir að þeir sem byrja 17 ára sjá fram á að taka mótorhjólaprófið 3svar sinnum. Það veldur talsverðum áhyggjum hvaða áhrif þetta hefur á nýliðun mótorhjólafólks í Bretlandi segir Paul Dickinson, formaður sambands mótorhjólakennara í Bretlandi. "Það mun verða vandamál að skýra út fyrir fólki hvernig kerfið virkar þegar það hringir til að forvitnast, og því hef ég áhyggjur af því að það muni fæla frá." Áhugavert verður að sjá hvaða leið verður farin hér á landi, en samkvæmt síðasta umferðarlagafrumvarpi var lagt til að A1 flokkurinn byrjaði við 18 ára aldur. Það er einu ári hærra en gert verður í Bretlandi. Sniglar hafa að sjálfsögðu mótmælt því harkalega, meðal annars með undirskriftarsöfnun hér á sniglar.is

Mótorhjólafólk í Frakklandi verður skyldað til að nota gulan lit í fatnaði sínum frá og með janúar á næsta ári. Viðbót við umferðarlögin frönsku (Le Code de la Route) segir að allir sem keyra mótorhjól yfir 125 rsm þurfi að gangast undir þetta. Flöturinn þarf að vera allavega 150 fersentimetrar á hvorri hlið og vera á efri hluta líkamans og nær einnig yfir farþega á mótorhjólum, svo og þa sem ferðast gegnum landið á mótorhjóli. Þeir sem fara ekki eftir þessum lögum þurfa að greiða sekt upp á 68€ eða um það bil 10.800 kr. Að sögn Ian Mutch frá MAG-UK eru lögin della. "Ökumaður sem sér ekki venjulega klæddan mótorhjólamann við góðar aðstæður ætti ekki að hafa ökuskírteini." Frakkar samþykktu lög árið 2008 sem skylda alla ökumenn til að hafa áberandi vesti í bílum sínum sem þeir verða að nota ef bíllinn bilar við veg.

Umferðaryfirvöld í London tilkynntu í gær að mótorhjólum væri nú óhætt að nota allar strætóreinar í borginni án takmarkanna. Þetta er ákveðið eftir þriggja ára reynslutíma á ákveðnum strætóreinum sem leiddi til aukins umferðarflæðis, minni mengunar og minni ferðatíma þeirra hjóla sem mæld voru. Eini hópurinn sem hefur sett sig á móti þessu eru samtök reiðhjólafólks sem hafa sagt að þetta auki hraða mótorhjóla með aukinni hættu fyrir reiðhjólafólk. Sannleikurinn er sá að meðalhraði mótorhjóla hefur lækkað um 6,5% þar sem leyft var að aka á strætóreinum og fjöldi þeirra sem fór yfir hámarskhraða minnkaði um fimmtung. Þetta hefur verið baráttumál samtaka eins og BMF og MAG UK lengi en leyfi mótorhjóla til að nota allar strætóreinar í London tekur gildi 23. janúar nk.

Neytendanefnd ESB kaus í dag um hið umdeilda frumvarp um gerðarviðurkenningu mótorhjóla. Skemmst er frá að segja að frá 2016 þurfa öll mótorhjól að verða grænni en þau eru í dag og hafa ABS hemlalæsivörn sem staðalbúnað, einnig létt hjól undir 125 rsm. Það sem flestum þykir þó alvarlegast er að frá og með 2014 verður eigendum mótorhjóla bannað að breyta eiginleikum véla sinna, og verða að láta skoða allar minniháttar breytingar sérstaklega. Enn á þó eftir að útfæra reglur þessar svo það er ekki öll von úti og mun FEMA áfram berjast gegn frumvarpi þessu og þá sérstaklega hinni umdeildu 18. grein. Að sögn Aline Delhaye, aðalritara FEMA eru sumir hlutar frumvarpsins góðir, eins og þeir sem lúta að endingu hjólanna og upplýsingagjöf. "Ef 18. greinin fer hins vegar óbreytt í gegn mun það þýða að hinar einföldu breytingar sem margir gera á hjólum sínum til að spara eldsneyti, auka þægindi eða bæta eiginleika hjólanna, verða ólöglegar. Hingað til hefur þetta ekki verið vandamál og það er engin ástæða til þess að ætla að þetta verði vandamál á morgun. Þess vegna mun FEMA áfram berjast fyrir breytingum á greininni" segir Aline. Sumir kynnu að spyrja hvaða máli einhver reglugerð hefur hér á landi, en með EES sáttmálanum skuldbindur Ísland sig til að taka upp lög ESB að mestu og þar á meðal þessi. Þótt kosning nefndarinnar sé ekki endanleg atkvæðagreiðsla sýnir hún líklega niðurstöðu Evrópuþingsins þegar kosið verður um frumvarpið snemma á næsta ári.

Eins og sjá má á þessu Youtube myndbandi frá Þýskalandi er hér áþreifanleg sönnun fyrir hversu vel undirakstursvarnir á vegrið virka þegar óhapp verður á mótorhjóli. Eins og mótorhjólafólk á Íslandi kannast við er meðal annars verið að prófa undirakstursvörn eins og þessa á vegriðinu milli Kópavogs og Garðabæjar, og er það samstarfsverkefni Snigla og Vegagerðarinnar. Munum við fara fram á að slík vörn verði sett upp á þá kafla sem geta talist hættulegir mótorhjólafólki. Því miður spretta þó víravegrið upp hérlendis sem aldrei fyrr, og þá helst til að koma í veg fyrir útafakstur. Slík vegrið hafa engar sérstakar varnir fyrir mótorhjólafólk og eru venjulega sett upp á stöðum þar sem hætta þykir á útafakstri, þá einnig fyrir mótorhjólafólk. Ástæðan fyrir notkun þeirra hérlendis er einföld, en þau minnka snjósöfnun á vetrum. Að vísu er það einnig öryggismál en það er spurning hvort sjónarmiðið vegur þyngra. Einnig hefur verið haldið fram að víravegrið séu ódýrari í uppsetningu en samkvæmt erlendum rannsóknum er viðhald þeirra dýrara sem er fljótt að gera þau jafndýr og hefðbundin vegrið. verið er að gera tilraunir erlendis á undirakstursvörnum fyrir víravegrið en slík vörn krefst þess að hún sé tekin niður á vetrum.