Bifhjólasamtök lýðveldisinns Sniglar

Kominn fiðringur í þig að fara út að hjóla? Var örugglega búið að hlaða rafgeyminn? Má ekki verða rafmagnslaus niðri á Ingólfstorgi og þurfa að láta ýta mér í gang.
Það er að mörgu að huga þegar vorið kemur snemma eins og í ár og betra að vera viss um að ALLT sé nú í lagi áður en farið er út að hjóla. Það er ekki bara rafgeymirinn sem skiptir máli heldur aðrir mikilvægari hlutir líka. Er nóg loft í dekkjunum sem hafa kannski staðið hreyfingarlaus í marga mánuði? Tékkaðu nú á hvaða loftþrýstingi er mælt með á hlið barðans því að of lítill þrýstingur getur leitt til skaks í hjólinu í beygjum. Er gangurinn góður eða er hann skrykkjóttur og hjólið kannski slæmt í gang? Jettar í blöndungum geta stíflast við geymslu og vatn sest að í bensíntanki svo eitthvað sé nefnt. Smávegis ísvari eða hreinsiefni ætluð mótorhjólum út í bensínið geta gert gæfumuninn. Og svo er það spurningin með ökumanninn. Er hann kannski orðinn dálítið ryðgaður eftir hreyfingarleysi vetrarins? Kannski sniðug hugmynd að skreppa á eitthvert bílaplanið að ná úr sér hrollinum og rifja aðeins upp hvernig bremsan virkar. Að lokum er best að muna eftir veginum sem er kannski ekki upp á sitt besta eftir veturinn. Er ný hola í malbikinu eða sandur í beygjunni? Það er líka meira ryk á götunum og minna grip svo ekki sé minnst á hvítu línurnar. Að mörgu er að huga en það sem er mikilvægast er að muna að sletta nú ekki um of úr klaufunum eins og belja að vori með halann upp í loftið. Rúnturinn endar heima!